Isa Halilaj, Pasthirrmat e gjuhës së sotme shqipe në të folmen e Lumës - Kukësit, Tiranë, 2016, 62 f.

Abstract

Libri nis me një parathënie, ku tregohet mënyra e punës së autorit për ta vjelë dhe pasqyruar lëndën. Pjesa e parë e librit titullohet Pasthirrmat. Bëhet një vlerësim i përgjithshëm për këtë klasë fjalësh sipas gramatikanëve: O. Myderrizi, K. Cipo, Sh. Demiraj, F. Agalliu, A. Angoni etj. Më shumë se kaq, autori përgjithëson mendimin e vet me konkluzionin se “këtyre “thërrmijave” nuk u është dhënë vendi i merituar në gramatologjinë shqiptare”. Sipas autorit, edhe Fjalorët e gjuhës shqipe duhet të pasqyronin më shumë pasthirrma. Në libër pasqyrohen mbi 470 pasthirrma e 67 tingullimitime (onomatope). E tërë lënda është vjelë në të folmen e Lumës (në 94 fshatra të Kukësit). Janë shfrytëzuar edhe studimet dialektologjike të Sh. Hoxhës, M. Hajdarit, B. Vatës e F. Totës etj. për këtë të folme. Siç dihet, e folmja e Lumës i përket nëndialektit verilindor të gegërishtes.